پەیامی پاڵپشتی ڕێکخراوە مەدەنیەکانی مەریوان بۆ هەڵویستی ئەنجومەنی سەوزی چیا

 پەیامی پاڵپشتی ڕێکخراوە مەدەنیەکانی مەریوان بۆ هەڵویستی ئەنجومەنی سەوزی چیا

✅ بۆ ڕای گشتی…

هەر وەک ئاگادارن ئەنجومەنی سەوزی چیا بە بڵاو کردنەوەی ڕاگەیاندەنێک بۆ ڕای گشتی، وێڕای دەربڕینی ناڕەزایی لە هەمبەر بەرپرسان و دەسەڵاتداران و دام و دەزگا پەیوەندیدارەکانی مەریوان و کاربەدەستانی ژینگە و سروشت، هەڵوێستی خۆی بۆ بەشداری نەکردن لە کۆژاندنەوەی ئاگری

دارستانەکان و تاڵانکاری سروشت و ژینگە دەربڕیوە، پێوایە پاراستنی ژینگە و دارستان و کۆژاندنەوەی ئاگرەکان ،بە پلەی یەکەمی ئەرکی دەسەڵاتە، پێویستە ئەوان بەرپرسیاری خۆیان لەم بوارەدا بە جێ بهێنن.

🔹 ئێمە وەک رێکخراوە مەدەنیەکانی مەریوان،ڕاشکاوانە پشتیوانی خۆمان بۆ ئەم هەڵوێستەی هاوڕێیانی چیا دەرئەبڕین، ڕێز و پێزانین بۆ ئەرک و ماندوو بوون و تێکۆشانیان پێشکەش ئەکەین. پێمان وایە ئەنجومەنی سەوزی چیا لە ماوەی زیاتر لە دوو دەیە، هیچ جۆرە خەبات و هەوڵ و تێکۆشانێک بۆ پاراستنی ژینگە کۆتایی نەکردووە.

🔹 لەم پێناوەدا ئازیزان و تێکۆشەرانی بیری سەوز، هەرچەندە ڕووبەڕووی گەلێک هێرش و هەڕشە و گرتن و زیندان بوونەتەوە، بەڵام سەربەرزانە بۆ گەیشتن بە ئامانجە پیرۆزەکانیان پاشەکشەیان نەکردووە و ئەم زەختانە نەیانتوانیوە کاریگەری نیگەتیڤ لە سەر ورە و ئیرادەیان دابنێ.هەر لە سەر درێژەدان بە ڕێبازەکەیان،ئەنجومەنی سەوزی چیا، باشترین ڕۆڵەکانی شەهید بوون و زوورترین هەزینەی داوە.

🔹ئێمە وەک کۆمەڵگای مەدەنی مەریوان، ڕێز ئەگرین لە هەر بڕیارێک کە دەستەی بەڕێوەبەر و ئەندامانی چیا بیگرن.

هەر لەم سۆنگەوە بە توندی ڕەخنە ئەگرین لە دام و دەزگا حوکمیەکان و دەسەڵاتی لۆکاڵی ئەم شارە، لەو بڕوایەداین کە بەرپرسانی ئەم شارە هەرگێز ئەرکی خۆیان لەم بوارەدا جێبەجێ نەکردوە، بە هۆی نەبوونی هەستی وڵات دۆستی  و ژینگە پارێزی،گەندەڵی و ڕانت ،کەمتەرخەم  بوون  بە شێوەیەکی جدی بۆ پاراستنی ژینگەی وڵاتەکەمان خەمخۆر و خاوەن هەڵوێست نەبوون و هەنگاوی جدیان هەڵنەگرتووە.

🔹کۆمەڵگای مەدەنی مەریوان بۆ  چارەسەر کردنی قەیرانی کاول کردن و بڕین و سووتاندنی دارستانەکان داوای هەڵوێستی جدی لە هەموو هاوڵاتیان و ژینگە دۆستان و لایەنە پەیوەندیدارەکان ئەکات، پێوایە پاراستنی سروشت و ژینگە، تەنیا ئەرکی ڕێکخراوە ژینگە پارێزەکان نییە بەڵکوو ئەرکی تاک بە تاکی کۆمەڵگایە،بە تایبەت لە وڵاتێکدا کە کاربەدەستان و بەرپرسان ئەرکی یاسایی و ئیداری خۆیان لەم سۆنگەوە بە جێ ناهێنن، لەم پێناوەدا هەر چەشنە هەڵوێست و ڕاکارێک بە مافێ سروشتی و یاسایی و حقوقی خۆمان لە ڕاستای وشیار کردنەوەی کۆمەڵگا ئەکرێ سوودی لێ بگیرێت. ئێمە هیوادارین ئەم هەڵوێستە و ئەم ڕاگەیاندنەی ئەنجومەنی سەوزی چیا، کاربەدەستان و بەرپرسانی ئەم شارە وشیار بکاتەوە تا ڕێکاری پێویست بۆ بەرگری و پاراستنی ژینگەی وڵاتەکەمان پەیدا بکەن و هەوڵی کارا بدەن بۆ ڕووبەڕوو بوونەوە لە گەڵ ئەو کەس و لایەنانە کە بە ئەنقەست ئاگر لە دارستانەکان بەرئەدەن و بیری تاڵانکاری ژینگەی ئەکەنەوە.

18گەلاوێژی 1401هەتاوی

شۆرای ڕێکخراوە مەدەنییەکانی مەریوان.

1.ئەنجومەنی فەرهەنگی-ئەدەبی مەریوان

2.ئەنجومەنوو فەرهەنگی-ئەدەبیو ڕۆجیاری

3.ناوەندی فەرهەنگی-هونەری ڤەژین

4.ناوەندی زانستی -کولتووری ڕۆنان

5.ئەنجومەنی نمایەشی مەریوان

6.ئەنجومەنی ژیانەوە(بەرنگاریی مادە هۆشبەرەکان)

7.کانوونی سەڵامەتی ژین

8.ئەنجومەنی پیشەیی مامۆستایانی مەریوان و سەوڵاوا

9.یەکیەتی مامۆستایانی ئایینی مەریوان و هەورامان(یەمامە)